Пандемия: ҚР Президенті Қытаймен шекарадағы уақытша шектеулер тезірек аяқталатынына сенім білдірді

(Онлайн Халық Газеті)2021 жыл 5 қараша
Пандемия: ҚР Президенті Қытаймен шекарадағы уақытша шектеулер тезірек аяқталатынына сенім білдірді

ҚР Президенті Қасым-Жомарт Тоқаев IV Қытай халықаралық импорттық тауарлар көрмесінің ашылу рәсімінде бейнеүндеу жасады. ҚазАқпарат бұл туралы Ақордаға сілтеме жасап хабарлайды.

Қасым-Жомарт Тоқаев өзінің бейнеүндеуінде жиынға қатысушыларды IV Қытай халықаралық импорттық тауарлар көрмесінің ашылуымен құттықтады.

– Биыл біздің достас халықтарымыз өз тарихындағы маңызды белеске жетті. Қазақстан Тәуелсіздігіне – 30 жыл. Қытай Коммунистік партиясының құрылғанына – 100 жыл. Сондай-ақ, екі айдан кейін тағы бір айтулы оқиғаны атап өтеміз. Қазақстан мен Қытай арасында дипломатиялық қатынастардың орнағанына 30 жыл толады. Бүгін біздің жан-жақты әрі мәңгілік стратегиялық серіктестігіміз кемелденіп, жаңа кезеңге қадам басты деп нық сеніммен айта аламын. Қарқынды дамып келе жатқан Қытай елі әрдайым Азиядағы ең басты және сенімді серіктесіміз болып қала береді, – деді Қазақстан Президенті.

ҚР Президенті өзара тиімді екіжақты ынтымақтастық кең-байтақ Еуразия құрлығында бірлесе дамуға және өркендеуге жол ашып отырғанына, сауда-экономикалық қатынастар – ықпалдастығымыздың берік іргетасы екеніне тоқталып, алдағы кезеңде солай бола беретінін атап өтті.

– Қиындыққа қарамастан, күрделі 2020 жылдың өзінде екіжақты тауар айналымы 5 пайызға өсіп, 15 миллиард доллардан асты. «Өзгерістер желі соққанда, біреулер қабырға тұрғызады, енді біреулер жел диірмен салады», – деген көне қытай нақылы бар. Пандемияға байланысты Қазақстан-Қытай шекарасына енгізілген уақытша шектеу шаралары тезірек аяқталып, алыс-беріс қайтадан жандана түседі деп сенеміз, – деді Қасым-Жомарт Тоқаев.

Қазақстан Президенті құттықтау сөзінде сауда-саттық әрдайым өркендеудің және халықаралық ынтымақтастықтың басты қозғаушы күші саналатынын, бұл қағидат ғасырлар бойы Ұлы Жібек жолының бойында орналасқан біздің өңір үшін де аса маңызды екенін айтты.

– Осы ежелгі сауда жолы Төраға Си Цзиньпиннің «Белдеулер мен жолдар» атты ауқымды бастамасының арқасында қайта жаңғырды. Қазір жыл сайын Қытайдан Еуропаға Қазақстан аумағы арқылы 500 мыңнан астам контейнер тасымалданады. Құрық теңіз айлағы іске қосылғаннан кейін «Ляньюнган – Карс» тасымал дәлізімен Қорғастан Ыстанбұлға жүк жеткізу мерзімі бес есеге, яғни 60 күннен 13 күнге дейін қысқарды. Біз Қорғастан бөлек, бірқатар көршілес елдермен жаңа шекарааралық хаб құрып жатырмыз, – деп атап өтті ҚР Президенті.

(Редактор:Ардақ Тұрсынтай,Deng Jie)

Фото