Қытай Қазақстанның негізгі сауда серіктесіне айналды

 «QazTrade сауда саясатын дамыту» акционерлік қоғамы 2023 жылдың сыртқы саудадағы қорытындысын жариялады, деп хабарлайды KAZINFORM.

Компанияның баспасөз қызметі 2023 жылы Қазақстан тауарын ең көп сатып алған елдердің көшін Қытай, Ресей және Италия болғанын мәлімдеп отыр.

Көш басындағы Қытаймен арадағы сауда айналымының 56,3%-ы экспортқа тиесілі көрінеді. Екі ел арасындағы сауда айналымының ақшаға шаққандағы жалпы көлемі – 31,5 млрд доллар.

Екінші орындағы Ресеймен сауда айналымы 26 млрд доллар болса, Италия - 16,1 млрд доллар болған. Одан кейінгі Оңтүстік Кореямен және Түркиядағы арадағы алыс-беріс көлемі 6 млрд долларға жеткен.

Қазақстан экспорттаған тауарлардың басында әдеттегідей шикі мұнай мен мұнай өнімдері тұр. Ал ең көп импортталған тауарлардың қатарын қондырғылар, көлік және оның бөлшектері, электрлі техника мен құнды емес металдар бастап тұр.

Компанияның мәліметінде Қазақстан сауда жасайтын елдердің қатары 131-ден 135 елге өскені айтылған.

Бір жыл бұрынғы деректерге қарасақ, 2022 жылы Қазақстанның басты сауда серіктестігі Италия (13,9 млрд доллар) мен Қытай (13,2 млрд доллар) болған. Одан кейінгі орындарға Ресей (8,8 млрд доллар), Нидерланд (5,48 млрд доллар) және Түркия жайғасқан еді (4,75 млрд доллар).