Қытайдың пайдаланылған автокөліктері дүниежүзінің 140-тан астам елдері мен аймақтарына экспортталды

27 ақпан, онлайн «Халық Газеті» -- Жақында Сауда министрлігі қатарлы бес департамент пайдаланылған көліктердің экспортына қатысты мәселелер бойынша хабарландыру жариялап, пайдаланылған көліктердің экспорты бүкіл ел бойынша жүзеге асырылатынын түсіндірді. Бұрын бұл Бейжің, Тяньцзинь және Шанхай сияқты 10 аймақта ғана жүзеге асырылатын.

Қытайдың пайдаланылған автокөліктерді экспорттау өнеркәсібі бірте-бірте ауқымды бағытқа бет бұруда. Кедендік деректер 2019 жылы пайдаланылған көліктердің пилоттық экспорты іске қосылғаннан бері Қытай экспорты бірнеше рет жаңа деңгейге жеткенін көрсетеді. 2021 жылы Қытай 15 000-ға жуық пайдаланылған автокөлікті экспорттады. 2022 жылы бұл көрсеткіш 69 000-ға жетіп, өткен жылдың сәйкес кезеңімен салыстырғанда 350%-дан астамға артты.

Қытай экспорттайтын пайдаланылған автомобильдердің едәуір бөлігі жаңа энергетикалық көліктер болып табылады. Тяньцзинь – елдегі пайдаланылған автомобильдерді экспорттауды жүзеге асырған алғашқы пилоттық қала. Қазіргі уақытта жаңа энергетикалық пайдаланылған автомобильдер Тяньцзинь еркін сауда аймағындағы осы сала бойынша экспорт үлгілерінің 70%-дан астамын құрайды.

Қытайдың автомобиль айналымы қауымдастығы президентінің көмекшісі Луо Лэй Қытайдың пайдаланылған көліктері әлемнің 140-тан астам елдері мен аймақтарына сатылғанын айтты.

Қытайдың пайдаланылған автокөлік экспортының мақсатты нарықтары негізінен Орталық Азияның бес елі, Африка және кейбір Оңтүстік-Шығыс Азия елдері болып табылады. 2022 жылдан бастап Ресей Қытайдың пайдаланылған автокөлік экспорты үшін маңызды нарыққа айналды. Энергетикалық дағдарыс салдарынан, Қытай Батыс және Шығыс Еуропаға пайдаланылған автокөліктер экспортын арттырып, автокөліктердің экспорттық нарығы біртіндеп Еуропаға қарай кеңеюде.

Сатудан кейінгі кепілдік-пайдаланылған көліктердің экспортындағы ең үлкен мәселе. Қазіргі уақытта кейбір пайдаланылған автокөлік экспорттаушы компаниялар сатудан кейінгі қызмет көрсету үшін нарықтың негізгі мақсатты елдеріндегі ірі қалаларда шетелдік қоймалар салды.