Биылғы жылы қазақстандық тасымалдау әдістері мен маршруттары айтарлықтай жаңартылды

Биыл Қазақстанда 185 локомотив және 143 жолаушылар вагоны сатып алынды. Бұл туралы ҚР үкімет отырысында көлік вице-министрі Мақсат Қалиақпаров айтты, деп хабарлайды Sputnik.

Жол-құрылыс жұмыстарымен 12 мың шақырым жол қамтылды. Төрт негізгі автожол дәлізі – Қарағанды – Алматы (879 км), Талдықорған–Өскемен (768 км), Ақтөбе – Қандыағаш (96 км) және Атырау – Астрахань (212 км) реконструкцияланды.

«Бұдан басқа, халықаралық тасымалдау саласында шетелдік рұқсат бланкілері электронды форматқа көшірілді. Мерзімді сегіз күннен бір күнге дейінгі оңтайландыру, сондай-ақ ірі монополистердің басым құқығы тоқтатылуы нәтижесінде Өзбекстанмен рейстер саны 5 мыңнан 33 мыңға дейін, Қытаймен – 50 мыңнан 230 мыңға дейін ұлғайтылды», - дейді ведомство басшысы.

Соңғы екі жылда қоғамдық көлік паркіндегі 3 267 автобус жаңартылды.

«Сонымен қатар биыл 1 401 шақырым теміржол желісі жөндеуден өткізіліп, 185 локомотив, 1,6 мыңнан аса жүк және 143 жолаушылар вагоны сатып алынды», - дейді Мақсат Қалиақпаров.

Авиация саласында қазақстандық компаниялар 10 ұшақ сатып алып, тасымалдау сыйымдылығын 7%-ке арттыруға ықпал етті. Халықаралық әуе маршруттарының желісі 22 бағыт бойынша кеңейтілді. Алматы мен Қызылорда әуежайларында жаңа терминалдардың құрылысы аяқталды, Шымкентте жұмыс аяқталу сатысында.