Германия компаниялары Қазақстанға инвестиция салуға дайын

ҚР Ауыл шаруашылығы вице-министрі Ермек Кенжеханұлы бастаған Қазақстан делегациясы Германияда өткен аграрлық іс-шараларға қатысып, стратегиялық келіссөздер жүргізді, деп хабарлады Sputnik.

Сапар барысында Германияның ауыл шаруашылығы министрі Джем Оздемирмен және Германияның азық-түлік пен ауыл шаруашылығы федералды министрлігінің парламенттік статс-хатшысы О. Никпен кездесулер өтті. Кездесулерде Орталық Азия елдері үшін Тұрақты егіншілік жөніндегі өңірлік орталық құру және екіжақты ынтымақтастық мәселелері талқыланды.

Тұрақты егіншілік жөніндегі өңірлік орталық құру туралы идея алғаш рет Қазақстан президенті Қасым-Жомарт Тоқаевтың 2023 жылы Германияға ресми сапары барысында ұсынылған болатын.

"Қазақстандық делегация John Deere, DF Deutsche Forfait AG, BVVG және Innari сияқты жетекші неміс компанияларының өкілдерімен келіссөздер жүргізді. Келіссөздер барысында агроөнеркәсіптік кешендегі бірлескен жобалар мен Қазақстан экономикасына инвестиция салу мүмкіндіктері қарастырылды", - деп жазылған хабарламада.