Бейжіңде «Қытай мен Қазақстан мәдениетінің тоғыспалы жылы» ашылды

1 сәуір, онлайн «Халық Газеті» -- 31 наурыз күні Бейжіңдегі Қытай ұлттық опера театрында «Қытай мен Қазақстан мәдениетінің тоғыспалы жылының» ашылу салтанаты өтті. Қытайдың Мәдениет және туризм министрі Сунь Ели мен Қазақстан Премьер-министрінің орынбасары, Мәдениет және ақпарат министрі Аида Ғалымқызы Балаева іс-шараға бірге қатысып, сөз сөйледі.

Сунь Ели өз сөзінде екі ел мемлекет басшыларының стратегиялық басшылығымен мәдениет пен туризм тұрақты және ұзақ мерзімді екіжақты қарым-қатынасты нығайтудың маңызды тірегіне айналғанын айтты. Ол екі тарап бірлескен археологиялық зерттеулер, орындаушылық өнерге арналған шығармашылық индустриялар және көркемдік семинарлар сияқты салалардағы ынтымақтастықты тереңдететінін атап өтті.

Аида Ғалымқызы Балаева екі ел халқының бір-бірінің мәдениетіне, дәстүріне және тарихына деген қызығушылығы күн сайын артып келе жатқанын атап өтті. Соңғы жылдары екі тарап арасындағы мәдени ынтымақтастық үздіксіз тереңдеп келеді: мәдени орталықтар бірінен соң бірі шаңырақ көтеріп, бірлескен жобалар тұрақты түрде жүзеге асырылып, театрландырылған қойылымдар мен тамаша концерттер өтіп, ал әртүрлі өнер және мәдени фестивальдер ұйымдастырылуда. 2024 жылы Қытайдағы Қазақстанның туризм жылы және 2025 жылы Қазақстанда Қытай туризмі жылы сәтті өтіп, екі ел арасындағы гуманитарлық байланыс одан әрі нығайды.

Ашылу салтанатында Қытай мен Қазақстан өнерпаздары бірлесіп өнер көрсетті. Онда дәстүрлі және эстрадалық әндер мен билер, аспаптық музыка және сән көрсетілімдері сияқты тартымды көріністер кештің кереметін асырды. Екі елдің өнерпаздары бір-бірінің ұлттық әндерін орындап, классикалық музыкалық шығармалар бойынша өнер ынтымақтастығын орнатты. Қытай мен Қазақстанның дәстүрлі және заманауи мәдени-көркемдік жетістіктері толық көрсетілді. Сол арқылы көрші екі елдің мәдени тоғысуының жемісті нәтижелері айқындалды.

2026 жылғы «Қытай мен Қазақстан мәдениетінің тоғыспалы жылы» іс-шарасын Қытай Мәдениет және туризм министрлігі мен Қазақстанның Мәдениет және ақпарат министрлігі бірлесіп ұйымдастырды.