Қазақстан астығының экспорты рекордтық деңгейге жетті

Қазақстан астығы әлемнің 45 еліне экспортқа шығарылады. Бұл туралы жыл қорытындысына орай БАҚ өкілдерімен кездескен ҚР Ауыл шаруашылығы министрі Айдарбек Сапаров айтты деп жазды ҚазАқпарат.

«2025 жылғы 11 айдың қорытындысында Қазақстандағы ауыл шаруашылығы жалпы өнімінің көлемі 6,1 пайызға өсіп, 9,2 трлн теңгені құрады»,- деді Айдарбек Сапаров.

Оның айтуынша, 2024 жылдың рекордық өнімі астық пен ұн экспортына әсер етті.

«2024-2025 маркетинг жылының қорытындысында Қазақстан рекордтық 13,4 млн тонна астық, ал жемдік ұнды қоса алғанда 15 млн тоннадан астам өнім экспортқа шығарды. Қалғаны Қазақстандағы мал азығына, қайта өңдеу мен тұқымға пайдаланылды. Жаңа өнімнен бүгінде 3,9 млн тонна астық экспортталды. Бұл өткен жылдың осындай кезеңімен салыстырғанда 13,6 пайызға көп. Экспорттық әлеует 13 млн тоннаға жетеді, ал экспорт географиясы әлемнің 45 елін қамтиды»,- деді ҚР Ауыл шаруашылығы министрі.

Фото:ҚазАқпарат