Өзбекстанда ірі газ кен орны табылды

Өзбекстанда 6500 метр тереңдікте орналасқан ірі газ кен орны табылды. Мұны Ташкент облысының ұстаздарымен кездесу барысында Өзбекстанның басшысы Шавкат Мирзиёев айтты, деп хабарлайды Kazinform агенттігінің меншікті тілшісі.

— Өзбекстан тарихында тұңғыш рет Үстірт өңірінде тереңдігі 6500 метр болатын ұңғыма бұрғыланды. Ол жерден табиғи газдың ең ірі қоры анықталды, — деді Шавкат Мирзиёев.

Оның атап өтуінше, бұл уақытқа дейін Өзбекстанда геологиялық барлау жұмыстары тек 2500-3000 метр тереңдікте жүргізіліп келген.

— Бұл ресурстардан дайын тауар жасау үшін бізге ең алдымен ғылым, білім және инновация қажет, — деді Өзбекстан президенті ұстаздармен кездесу барысында.

Шавкат Мирзиёевтің айтуынша, Өзбекстанда теллур, литий, графит, молибден, вольфрам, титан және басқа да металлдардың ірі қоры бар.